Shavkat Mirziyoyev AQSH kongressmenlarini qabul qildi
O‘zbekiston Respublikasi Prezidenti Shavkat Mirziyoyev 6-oktabr kuni Amerika Qo‘shma Shtatlari Kongressi Vakillar palatasining kongressmenlar Don Beykon, Dug Lamborn, Troy Nels va Avgust Pflyugerdan iborat delegatsiyasini qabul qildi. Bu haqda Prezident matbuot xizmati xabar bermoqda.
AQSH delegatsiyasi ikki tomonlama parlamentlararo hamkorlikni mustahkamlashga doir kelishuvlar doirasida mamlakatimizda bo‘lib turibdi.
Qayd etilishicha, uchrashuvda ikki mamlakat o‘rtasidagi amaliy hamkorlikni yana-da kengaytirish masalalari ko‘rib chiqildi.
Davlatimiz rahbari parlamentlar darajasidagi faol aloqalar va samarali almashinuvlarni, ular O‘zbekiston-AQSH strategik sheriklik munosabatlarini jadal rivojlantirishga katta hissa qo‘shayotganini yuksak baholadi.
AQSH Kongressida tashkil etilgan O‘zbekiston bo‘yicha kokus – do‘stlikni mustahkamlash va konstruktiv muloqotni ilgari surish bo‘yicha parlament guruhining nufuzi ortib bormoqda, faoliyati kengaymoqda. Bugungi kunda Kokus tomonidan ko‘p qirrali hamkorlikni va mamlakatimizdagi islohotlar dasturini qo‘llab-quvvatlashga qaratilgan qator muhim loyihalar ilgari surilgan.
Kongressmenlar Yangi O‘zbekistonda amalga oshirilayotgan yangilanishlar strategiyasi mamlakat barqaror taraqqiyotining muhim omili ekani hamda uning xalqaro maydondagi obro‘si sezilarli darajada yuksalishiga xizmat qilganini alohida taʼkidladilar.
Shuningdek, Afg‘onistondagi insonparvarlik operatsiyalari qo‘llab-quvvatlangani uchun samimiy minnatdorlik bildirildi.
Suhbat chog‘ida parlamentlararo yo‘nalish bilan bir qatorda AQSH delegatsiyasi aʼzolari vakillik qilayotgan yetakchi shtatlar - Nebraska, Kolorado va Texas bilan hamkorlik bo‘yicha loyiha va dasturlar muhokama qilindi.
Innovatsiyalar va sanoat texnologiyalari, IT sohasi, qishloq xo‘jaligi, “yashil” energetika, sog‘liqni saqlash va taʼlimda kooperatsiyani yo‘lga qo‘yish masalalariga alohida eʼtibor qaratildi.
Uchrashuv yakunida qo‘shma “yo‘l xarita”sini tayyorlash va ishbilarmonlik missiyalarining o‘zaro tashriflarini tashkil etish yuzasidan kelishuvga erishildi.
Avvalroq Prezident Shavkat Mirziyoyev Jahon banki vitse-prezidenti Anna Byerde hamda Xalqaro moliya korporatsiyasi boshqaruvchi direktori Maxtar Diop boshchiligidagi delegatsiyani qabul qilgani haqida xabar berilgandi.
