ISHID Iroq armiyasiga hujum uyushtirdi
Hujumni qaytarish maqsadida aviatsiya qo‘llanilgan.
ISHID jangarilari Iroqda armiya bazasiga hujum uyushtirdi. Bu haqda “TASS” xabar berdi.
Hujum Bag‘dod shimolidagi Ar-Rashidiya atrofidagi Iroq armiyasi 11-diviziyasi bazasiga uyushtirilgan. Oqibatda ikki harbiy halok bo‘lgan.
Vaziyatni o‘nglash maqsadida armiya aviatsiyasining harbiy samolyotlari ishga solingan. Shuningdek, bazaga hujum qilishdan avval terrorchilar Diyala viloyati Al-Mikdadiya shahri atrofida 14 nafar tinch aholi vakillarini o‘ldirib, 15 nafarini o‘g‘irlab ketgan. Iroq prezidenti Barxam Solih o‘zining Twitter sahifasida bu kabi hodisalarni “mamlakatdagi vaziyatni qabih ravishda beqarorlashtirish” deb baholagan. Uning so‘zlariga ko‘ra, Iroq xavfsizlikni kuchaytirishi hamda ISHID dan bo‘ladigan tahdidlarga qarshi hushyor turishi kerak. “Terrorchilar tez orada jazolanadi”, – degan prezident.
Ma'lumot o'rnida: ISHID 2014 yilda Iroqning uchdan bir qismini egallab olishga muvaffaq bo‘lgan. 2015 yildan boshlab Xalqaro koalitsiya yordamida mamlakatni terrorchilardan tozalash operatsiyasi boshlangan. 2017 yilda Iroq hukumati ISHID to‘la mag‘lub bo‘lganini eʼlon qildi.
Bundan avval Iroqda ISHID bosh moliyachisi qo‘lga olingani xabar qilingandi.
Jahongir Qo'ziyev
