AQSH va Rossiya muhim yo‘nalishda muzokara olib borayotgani maʼlum qilindi
Bu sohada ikki tomonlama bir necha bor uchrashuv o‘tkazilgan.
AQSH va Rossiya kiberxavfsizlik bo‘yicha yopiq formatda muzokaralar olib borayotgani maʼlum bo‘ldi. Bu haqda The New York Times xabar berdi.
Muzokaralarda AQSH tomoniga prezidentning milliy xavfsizlik masalalari bo‘yicha maslahatchisi o‘rinbosari Enn Nyuberger boshchilik qilmoqda. Nashr maʼlumotlariga ko‘ra, Qo‘shma Shtatlar va Rossiya rahbarlarining iyun oyidagi uchrashuvidan keyin tomonlar turli masalalar bo‘yicha muloqot o‘tkazgan. Shu bilan birga, maqola mualliflari Vashington va Moskva o‘rtasidagi strategik barqarorlik bo‘yicha muzokaralar so‘nggi yillardagi eng chuqur muloqotga aylanganini qayd etdi.
Xabarda aytilishicha, Nyuberger bir necha bor rossiyalik hamkasblari bilan virtual uchrashuv o‘tkazgan. Bundan tashqari, bir necha hafta avval Moskvaga Amerikaga kiberhujum uyushtirgan xakerlar to‘g‘risida maʼlumotlar taqdim etilgan. Nashrning taʼkidlashicha, "AQSH bu maʼlumotlar jinoyatchilarni qamoqqa olinishiga umid bildirmoqda". Shu orqali Vashington Rossiyaning kiberjinoyatlarga qarshi kurashish to‘g‘risidagi niyati qay darajada ekanligiga baho bermoqchi.
Avvalroq bir guruh mashhur shaxslarning shaxsiy maʼlumotlari xakerlar tomonidan o‘g‘irlangani hamda Buyuk Britaniya o‘ziga zarar yetkazgan davlatlarga qarshi kiberhujumlar uyushtirishi xabar qilingandi.
Jahongir Qo'ziyev
