AQSH hukumati xakerlar guruhini topish uchun katta mablag‘ ajratdi
Bu guruh AQSHda favqulodda vaziyat joriy qilinishiga sabab bo‘lgan.
AQSH Davlat departamenti Darkside xakerlar guruhini qo‘lga olishga imkon beruvchi maʼlumotlar uchun 10 million dollar mukofot berilishini eʼlon qildi. Bu haqda TASS xabar berdi.
Davlat departamenti tarqatgan press-relizga ko‘ra, ushbu xakerlar guruhi Amerikaning Colonial Pipeline kompaniyasiga uyushtirilgan kiberhujum ortida turgan. Shuningdek, xakerlarni qo‘lga olishda bevosita yordam bergan shaxslarga qo‘shimcha 5 million dollar mukofot vaʼda qilingan.
DarkSide xakerlar guruhi Colonial Pipeline kompaniyasiga hujum qilishi oqibatida AQSH sharqida 5 kun davomida barcha neft quvurlari ishdan chiqqandi. O‘shanda prezident Jozef Bayden mamlakatda favqulodda holat joriy etgan. Amerika razvedkasi xakerlar guruhi Rossiya yoki Sharqiy Yevropada joylashgan, degan taxminni ilgari surgan.
Avvalroq AQSH va Rossiya kiberxavfsizlik bo‘yicha muzokaralar olib borgani xabar qilingandi.
