Qozog‘istonda mahbuslar uchun sanoat zonalari mavjud bo‘lgan yangi koloniyalar quriladi

 

Yangi koloniyalar Olmaota, Aqto‘be, Mang‘istau va Turkiston viloyatlarida joylashtiriladi. Bu haqida “Fergana.media” “Vlast.kz” ga tayanib xabar berdi.

 

Unda aytilishicha, har bir koloniya sig‘imi 1,5 ming nafargacha mahkumni qamrab oladi. Ushbu koloniyalarning har birida maxsus sanoat zonalari ajratiladi. Bu muassasalar hududining deyarli 50 foizini tashkil qiladi.

 

Maʼlumotlarga ko‘ra, ayni vaqtda Qozog‘iston Davlat-xususiy sheriklik doirasida koloniyalar qurish masalasi ko‘rib chiqilmoqda. Yangi axloq tuzatish muassasalari mahkumlarni saqlashda “jamiyat va xalqaro tashkilotlar tomonidan talab qilinadigan” barcha standartlarga javob beradi.

 

Maʼlumot uchun: bugungi kunda Qozog‘istonda 64 ta axloq tuzatish muassasasi va 16 ta tergov hibsxonasi mavjud. Ularda 34 mingdan ortiq odam bor. Shuningdek, mahkumlardan 30 ming nafari allaqachon sudlangan, qolganlari hibsga olingan va tergov ostida turibdi.

 

Mamlakat Ichki ishlar vazirligi maʼlumotlariga ko‘ra, mahkumlarning qariyb 93 foizi og‘ir va o‘ta og‘ir jinoyatlar sodir etgan. Ulardan 45 foizi avvalroq jinoiy javobgarlikka tortilgan.

 

Eslatib o'tamiz, Qozog‘iston parlamenti 3-noyabr kuni respublika mustaqilligining 30 yilligi munosabati bilan amnistiya to‘g‘risidagi qonunni maʼqulladi. Unga binoan, 2,2 mingdan ortiq mahkum va probatsiya xizmatida ro‘yxatdan o‘tgan 11,3 ming kishi qamrab olingan. Bunda mahkumlarning fuqarolar va davlat xavfsizligiga jiddiy xavf tug‘dirmasligi, voyaga yetmaganligi, keksaligi, birinchi va ikkinchi guruh nogironligi hisobga olingan.

 

Avvalroq qamoqxonalardagi mahkumlar soni bo‘yicha reyting eʼlon qilingani, Isroildagi Gilboa qamoqxonasidan yer osti tunneli orqali olti mahbus qochib ketgani hamda O‘zbekiston qamoqxonalarida qancha diniy va siyosiy mahbuslar mavjudligi ochiqlangani haqida xabar berilgandi.

 

Olamgir Abdiyev