Shavkat Mirziyoyevning qayta saylanishi Hindiston-O‘zbekiston aloqalarining yana-da mustahkamlanishiga zamin yaratadi — “India Narrative”
O‘zbekistonni Hindistonning Markaziy Osiyodagi eng muhim hamkoriga aylantiradi.
Hindistondagi yetakchi siyosiy-tahliliy saytlardan biri bo‘lgan “India Narrative” veb-sahifasida “Narendra Modining yaqin hamkori Shavkat Mirziyoyevning O‘zbekiston Prezidenti lavozimiga qayta saylanishi Hindiston va Markaziy Osiyo davlatlari o‘rtasidagi aloqalar ko‘lamining yana-da kengayishi uchun zamin yaratadi” sarlavhali maqola eʼlon qilindi. Bu haqda “Dunyo” AA xabar berdi.
Qayd etilishicha, “International Affairs Review” onlayn-nashri bosh muharriri, siyosiy tahlilchi Aditi Bxaduri tomonidan tayyorlangan maqola joriy yil 24-oktabr kuni mamlakatimizda bo‘lib o‘tgan O‘zbekiston Prezidenti saylovi yakunlariga bag‘ishlangan.
“Yaqinda O‘zbekistonda bo‘lib o‘tgan Prezident saylovi natijalariga ko‘ra, Shavkat Mirziyoyevning Prezident lavozimiga qayta saylangani O‘zbekistonning kelgusi taraqqiyoti va Hindiston bilan o‘zaro munosabatlar rivoji uchun muhim ahamiyat ega”, — deb yozadi muallif.
Shuningdek, maqolada O‘zbekiston dunyoning eng yaxshi sayyohlik yo‘nalishlaridan biriga aylanganiga eʼtibor qaratilgan. Yurtimizda qo‘shimcha ish o‘rinlari yaratilgani, hozirgi kunga kelib esa O‘zbekistonning yalpi ichki mahsuloti hajmi 60 milliard dollarga yetgani haqida so‘z boradi.
Terrorizm va diniy radikalizm kabi xurujlarga chek qo‘yildi. Jamiyatda din va eʼtiqod erkinligi to‘liq taʼminlandi.
Muallifning fikricha, yuqorida qayd etilgan barcha sohalardagi yutuqlar mamlakat taraqqiyotida muhim o‘rin tutish bilan birga, o‘z navbatida, O‘zbekistonni Hindistonning Markaziy Osiyodagi eng muhim hamkoriga aylantiradi. Shavkat Mirziyoyevning qayta saylanishi hind-o‘zbek ikki tomonlama munosabatlarini yana-da mustahkamlanishiga xizmat qiladi.
“Prezident Shavkat Mirziyoyevning qayta saylanishi O‘zbekistondagi jadal islohotlar jarayonini davom etishini anglatish bilan birgalikda, o‘z navbatida, Hindiston-O‘zbekiston aloqalarining yana-da mustahkamlanishiga zamin yaratadi”, — deya xulosa qilgan siyosiy tahlilchi Aditi Bxaduri.
Eslatib o‘tamiz, Omanda nashr etiladigan "Asdaa Oman" gazetasi bosh muharriri Ali al-Hasaniy O‘zbekiston Prezidenti etib saylangan Shavkat Mirziyoyevning lavozimga kirishishiga bag‘ishlangan tantanali marosim haqidagi fikrlari bilan o‘rtoqlashgandi.
Avvalroq O‘zbekiston-Filippin munosabatlarining hozirgi holati va rivojlanish istiqbollari muhokama qilingani, O‘zbekiston va Turkmaniston o‘rtasidagi savdo-iqtisodiy aloqalar butunlay yangi bosqichga ko‘tarilgani hamda "The Korea Times" gazetasi O‘zbekistonda amalga oshirilayotgan tub islohotlar bo‘yicha maqola chop etilgani haqida xabar berilgandi.
