Pillaning har bir kilosi uchun 5 000 so‘mdan subsidiya ajratiladi
Pillachilik klasterlari va tashkilotlari subsidiya oluvchilarga pullarni kartaga yoki bankdagi hisobvaraqlariga o‘tkazib beradi.
Hukumat qarori bilan tasdiqlangan nizomga binoan, Pilla yetishtiruvchilarga subsidiya ajratish tartibi belgilandi.
Unga ko‘ra, Ipakchilik va jun sanoatini rivojlantirish qo‘mitasi tomonidan har yili 20-iyulgacha respublikadagi pilla yetishtirish prognozlari ishlab chiqilib Moliya vazirligiga tadqim qilinadi.
Moliya vazirligi prognoz asosida byudjetdan subsidiya ajratib Qo‘mitaga 1 fevralgacha o‘tkazib beradi.
Shundan so‘ng, Pillachilik klasterlari va tashkilotlari “Agropilla” MCHJlar bilan subsidiya oluvchilar ro‘yxatini shakllantiradi va 25 fevralgacha Agentlikning hududiy boshqarmasiga beradi.
Hududiy boshqarma ro‘yxatni umumlashtirib 1 martgacha Qo‘mitaga yuboradi.
Qo‘mita 10 aprelgacha pullarni subsidiya oluvchilarga berish uchun maxsus hisobvaraqlarga o‘tkazadi.
Maʼlumot uchun, 2022 yil 1 yanvardan 2025 yil 1 yanvargacha pillaning har kilogrammi uchun 5 ming so‘m subsidiya beriladi.
Avvalroq har bir kilogramm pilla uchun davlat tomonidan qo‘shimcha subsidiya berilishi haqida xabar berilgandi.
Olamgir Abdiyev
