Nasafning OCHL pley-offidagi raqibi maʼlum bo‘ldi
Mazkur bahs 15 mart kuni bo‘lib o‘tadi.
Osiyo futbol konfederatsiyasi 2022 yilgi Osiyo Chempionlar ligasiga yo‘llanma olgan barcha jamoalar nomini maʼlum qildi. OFK Chempionlar ligasidagi ishtirokini pley-offdan boshlaydigan Qarshining “Nasaf” jamoasi guruh bosqichiga chiqish uchun BAAning “Baniyas” klubi bilan bahs olib boradigan bo‘ldi. “Ajdarlar” saralash uchrashuvini 15 mart kuni raqib jamoa maydonida o‘tkazadi.
Eslatib o‘tamiz, qarshiliklar “Baniyas” klubini yenggan taqdirda, OCHL guruh bosqichiga yo‘l olishadi. Shu orqali Jizzaxning “So‘g‘diyona” klubi OFK Kubogida ishtirok etish imkoniyatiga ega bo‘ladi. Aks holda, Nasafning o‘zi OFK Kubogida ishtirokini boshlaydi va Jizzax klubi xalqaro musobaqada qatnashish imkoniyatini qo‘ldan chiqaradi.
Avvalroq, “Nasaf” klubi endi futbolchi sotib ololmasligi va Chiroqchi tuman hokimligi qarshisidagi markaziy o‘yingoh qarovsiz ahvolga kelib qolgani haqida xabar berilgandi.
Jamshidbek Amirov
