“Bu navbatdagi janglarimga tayyorgarlik vazifasini bajarib beradi”
Bahodir Jalolov 18-mart kuni yana ringga ko‘tariladi.
Bir necha kun oldin og‘ir vazn toifasidagi o‘zbekistonlik bokschi Bahodir Jalolovning navbatdagi raqibi maʼlum bo‘lgandi. Zamon.uz sportchi bilan bog‘lanib, ushbu jangga tayyorgarlik jarayoni haqida maʼlumot oldi.
Jalolovning so‘zlariga ko‘ra, ayni damda u murabbiylari qo‘li ostida Toshkent viloyatidagi Yangiobod o‘quv bazasida mashg‘ulot olib bormoqda.
“Keyingi raqibim polshalik Kamil Sokolovskiga qarshi bo‘lib o‘tadi. U bir qator kuchli bokschilar bilan murosasiz bahs olib borgan. Mening promotrlarim shu bokschini tavsiya etishdi. Sababi bu navbatdagi raqiblarim bilan bo‘ladigan janglarga tayyorgarlik vazifasini bajarib beradi. Ushbu jang 8 rounddan iborat bo‘ladi. Niyatim bu jangimda ham g‘alaba qozonib reytingimni oshirib olish. Hozirda tayyorgarlik jarayonini Yangiobod o‘quv bazasida olib boryapmiz. Yaqinda Rossiyadan sparring raqiblarimiz kelishi kerak. Shularni kutyapmiz”.
Eslatib o‘tamiz, Bahodir Jalolov o‘zining professional yo‘nalishdagi navbatdagi jangini 18 mart kuni Dubay shahrida o‘tkazadi. “Probellum” kompaniyasi tomonidan tashkil etiladigan boks oqshomida unga polshalik Kamil Sokolovski raqiblik qiladi. Jalolov oxirgi jangida kolumbiyalik Xulio Sezar Kalimenoni birinchi rounddayoq mag‘lubiyatga uchratgandi. Shu kungacha bokschimiz prof boksda 9 marta jang o‘tkazib, ularning barchasida raqiblarini nokautga uchratgan.
Maʼlumot o‘rnida: Jalolov 2019-yil jahon chempionatida va Tokio Olimpiyadasida chempionlikni qo‘lga kiritgan.
Jamshidbek Amirov
