Murodjon Ahmadaliyev AQSHga jo‘nab ketdi
Navbatdagi jang sanasi malum emas.
Bugun, 25-fevral kuni tunda Islom Karimov nomidagi Xalqaro aeroportdan WBA va IBF chempioni Murodjon Ahmadaliyev chempionlik kamarini himoya qilish uchun Amerika Qo‘shma Shtatlariga jo‘nab ketdi.
Namanganlik bokschini kuzatib qo‘yish uchun yaqinlari, do‘stlari va OAV vakillari aeroportga chiqishdi.
Murodjon Ahmadaliyev:
“Amerikaga uchib ketyapman. Raqibim aniq, yaʼni amerikalik Ronni Rios, biroq jang sanasi maʼlum emas. Xudo xohlasa jang kuni aniq bo‘lsa, xalqimizga eʼlon qilamiz. O‘zbekistonda jang qilish niyatim bo‘ldi, ammo bu himoya jangi – butun dunyo kuzatadi”.
Bundan tashqari bokschining onasi ham bo‘lib o‘tadigan jangga o‘z munosabatini bildirgan:
“Jangdan bir kun oldin farzandim bilan gaplashaman. Ortingda prezident turibdi, yutishing kerak! deb taʼkidlayman. Jang boshlanganda ko‘rmay, ko‘chani supurishga chiqib ketaman, keyin natijasini bilaman”.
Maʼlumot o‘rnida: Murodjon Ahmadaliyev chempionlik kamarini himoya qilish uchun amerikalik Ronni Riosga qarshi jang qiladi. Bokschining maʼlum qilishicha, ushbu jang AQSHning Las-Vegas shahrida bo‘lib o‘tadi, ammo jang sanasi hozircha maʼlum emas.
