Turkman gazini Janubiy Osiyoga yetkazib beruvchi o‘tkazgich qurilishi qachon boshlanadi?
“Tolibon” bu bo‘yicha Turkmaniston bilan muzokara o‘tkazdi.
Yaqin kunlarda TAPI gaz quvuri loyihasi amalga oshirilishi boshlanadi. Bu haqda “Sputnik Afganistan” xabar berdi.
Unga ko‘ra, Afg‘oniston mudofaa vazirligi vakillari turkman tomoni bilan loyiha xavfsizligi bo‘yicha muzokara o‘tkazgan. Turkmaniston tomonidan muzokaralarda Afg‘onistondagi elchi Xo‘ja Ovezov va TAPI Pipeline Company Ltd. Konsorsiumi ijrochi direktori Muhammedmurod Amanov ishtirok etgan.
Maʼlumot o‘rnida: Turkmaniston — Afg‘oniston — Pokiston — Hindiston gaz quvuri. “Tolibon” hokimiyat tepasiga kelgach, bu yo‘nalishni tezroq amalga oshirish maqsadida bir qancha muzokaralar o‘tkazildi. Toliblar rahbariyati ham loyihaning qay darajada muhim ekanini yaxshi anglaydi.
Masalan, Afg‘oniston mudofaa vaziri vazifasini bajaruvchi, “Tolibon” harakati asoschisi Mulla Umarning o‘g‘li Mulla Yoqub TAPI uchun istalgan qurbonlikka tayyorligini maʼlum qilgan.
Ushbu loyihani amalga oshirish 2015 yildan boshlangan. Uning umumiy qiymati 10 milliard dollarni tashkil etadi. Gaz quvuri umumiy uzunligi 1814 kilometr. U orqali yiliga 30 milliard kubometr gaz eksport qilish mumkin. Maʼlumotlarga ko‘ra, Afg‘oniston bu loyiha amalga oshsa, yiliga 500 million dollar foyda oladi.
Eslatib o‘tamiz, avvalroq Ashraf G‘ani Afg‘onistonga qaytmasligi maʼlum qilingandi.
