Urush tufayli millionga yaqin ukrainalik vatanini tark etdi — BMT
So‘nggi uch kunda qochqinlar soni ikki barobar oshgan.
BMT qochqinlar masalasi agentligi Ukrainadagi urush ortidan qancha qochqin paydo bo‘lganini maʼlum qildi. Bu haqda BBC xabar berdi.
Unga ko‘ra, 24-fevraldan buyon Ukrainani bir millionga yaqin kishi tark etgan. Qochqinlar soni so‘nggi 3 kunda ikki barobarga oshgan. BMT maʼlumotlariga ko‘ra, ularning aksariyati Polshaga ketgan. U yerga yuz minglab qochqinlar borgani aytilmoqda.
BBC taqqoslash uchun quyidagi statistikani keltirgan: qurolli to‘qnashuvlar avjiga chiqqan 2015 yilda Suriya, Iroq va Afg‘onistonni jami 1.3 million kishi tark etgan.
Maʼlumot o‘rnida: 24-fevral kuni Rossiya Ukraina sharqida maxsus operatsiya boshlaganini eʼlon qildi. Shu kungacha Berdyansk, Xerson kabi yirik shaharlar egallandi. Odessa va Mariupol hozirda qurshab olingan. Kiyev va Xarkov ostonalarida qonli janglar davom etmoqda. Urush ortidan Moskvaga qarshi G‘arb yangi sanksiyalar joriy etdi. Yevroittifoq va AQSH Rossiya samolyotlari uchun osmonini yopdi.
Eslatib o‘tamiz, avvalroq Rossiyaning qator banklari SWIFT tizimidan uzib qo‘yilgani to‘g‘risida xabar berilgandi.
