Paxtachidagi “samosud” yuzasidan rasmiy munosabat bildirildi
Ikki fuqaro janjaliga bozor nazoratchisi aralashgan.
Ijtimoiy tarmoqlarda "Samarqand viloyati Paxtachi tumanida bozor nazoratchisi yoshi kattaroq erkakni samosud qilgani aytilmoqda" sarlavhasi ostida tarqalgan video yuzasidan rasmiy maʼlumot eʼlon qilindi.
2022-yilning 3-mart kuni Paxtachi tumani "Tadbirkor" mahallasida joylashgan dehqon bozorida Narpay tumani "Tepa" mahallasida yashovchi, 1965 yilda tug‘ilgan X.K. hamda Paxtachi tumani "Qora tepa" mahallasida yashovchi, 1975 yilda tug‘ilgan X.D. o‘rtasida kelishmovchilik yuzaga kelgan. Holatga bozor nazoratchisi aralashib, ularni ajratib, IIB xodimlariga xabar bergan.
Hodisa joyiga tuman IIB xodimlari borib, fuqarolar IIB binosiga olib kelingan.
Hozirda holat yuzasidan tergovga qadar tekshiruv harakatlari olib borilmoqda.
