GFR sobiq kansleri Ukrainadagi vaziyatni yumshatish uchun Moskvaga bordi – Bild
Nashr maʼlumotlariga ko‘ra, buni Ukraina hukumati iltimos qilgan.
Germaniyaning sobiq federal kansleri Gerxard Shryoder Ukraina hukumati iltimosiga ko‘ra Rossiyaga bordi. Bu haqda Bild gazetasi xabar berdi.
Gazeta maʼlumotlariga ko‘ra, Shryoder ushbu tashrifini o‘zi aʼzo bo‘lgan Gemaniya sotsial-demokratik partiyasi bilan ham, GFR hukumati bilan ham muhokama qilmagan. U bir necha kun avval o‘z yaqinlariga Moskvaga borgani haqida aytgan.
Payshanba kuni Amerikaning Politico gazetasi sobiq kansler Moskvaga Putin bilan Ukrainadagi vaziyatni muhokama qilish uchun borgani to‘g‘risida xabar tarqatdi. Gazeta maʼlumotlariga ko‘ra, Shryoder bundan oldin Turkiyada Ukraina delegatsiyasi aʼzolaridan biri bilan muloqot qilgan.
Germaniyaning amaldagi kansleri Olaf Shols bu xabarlarga munosabat bildirmadi.
Maʼlumot o‘rnida: Gerxard Shryoder 1998-2005 yillarda Germaniya hukumatini boshqargan. O‘z vaqtida u Germaniyani Rossiyaning YEIdagi asosiy xamkoriga aylantirdi. Shryoder va Putin do‘st sifatida ko‘riladi.
Sobiq kansler 2017 yildan buyon “Rosneft” direktorlar kengashi raisi hisoblanadi. Shuningdek, u Nord Stream AG aksionerlar qo‘mitasi va shu kompaniya direktorlar kengashiga raislik qiladi.
Eslatib O‘tamiz, avvalroq Olaf Shols sobiq hamkasbidan Rossiya kompaniyalariga rahbarlik qilishni to‘xtatishni so‘ragandi.
