Iroq o‘zaro hisob-kitob maydoni emas — Mustafo al-Kozimiy
Avvalroq Eron Iroq hududiga raketa zarbalari bergandi.
Iroq bosh vaziri uning mamlakatini shaxsiy hisob-kitob maydoniga aylantirmaslikni so‘radi. Bu haqda u AQSH davlat kotibi Entoni Blinken bilan suhbatda aytgan.
Mustafo al-Kozimiy Iroqni tashqi kuchlarning shaxsiy hisob-kitob maydoniga aylantirmaslik muhimligini taʼkidlagan.
U Bag‘dod xalqaro va mintaqaviy miqiyosda o‘z o‘rnini mustahkamlayotganiga eʼtibor qaratgan. Blinken o‘z navbatida "Qo‘shma Shtatlar Iroq bilan birdamligini va uning xavfsizligi hamda suvereniteti uchun barcha choralarni qo‘llab-quvvatlashini" maʼlum qilgan.
Maʼlumot o‘rnida: 13 martga o‘tar kechasi Iroq shimolidagi Arbil shahriga raketa zarbasi berildi. U AQSH konsulxonasi yaqinida portlagan. Shuningdek, mahalliy teleknal ofisiga zarar yetgan.
Eron hujum bo‘yicha javobgarlikni zimmasiga oldi. Qator OAV zarbalar aslida “Mossad”ning maxfiy bazasiga berilganini yozgan. Ammo Iroq Kurdistoni hukumati buni inkor qildi.
Eslatib o‘tamiz, avvalroq Iroqda ISHID xavfi yuqoriligicha qolayotgani to‘g‘risida xabar berilgandi.
