Turkiya Afg‘oniston shimolidagi neft konlarini o‘zlashtirmoqchi
Buning uchun 250 million dollar investitsiya kiritish mo‘ljallangan.
Turkiya Amudaryo basseynidagi neft konlarini o‘zlashtirish uchun katta mablag‘ ajratmoqchi. Bu haqda Afg‘oniston tog‘-kon sanoati vazirligiga tayanib Ariana News xabar berdi.
Vazirlik rasmiy vakili Ismatulla Burxonning maʼlum qilishicha, turk kompaniyalari buning uchun 250 million dollar investitsiya kiritmoqchi.. Ammo Burxon bu aynan qaysi kompaniyalar ekanini ochiqlamagan. Shu bilan birga u Amudaryo nefti uchun Markaziy Osiyo va Eron korxonalari ham raqobatlashayotganini maʼlum qilgan.
Afg‘oniston savdogar va investorlari assotsiatsiyasi rahbari Boz Muhammad G‘ayratning taʼkidlashicha, mamlakat shimoli uglevodorodlarga boy. U Rossiya kompaniyalarini ham konlarni o‘zlashtirishga chaqirgan.
Maʼlumot o‘rnida: 2006 yilda AQSH geologiya xizmati shimolda 1.6 milliard barrel neft, 450 milliard kubometr tabiiy gaz va 14 million kub metr suyultirilgan uglevodorod gaz zaxiralari mavjudligini aniqlagan. Amudaryo basseynida ko‘plab o‘rganilmagan gaz konlari bor.
Avvalroq AQSH Afg‘onistonga qo‘shimcha 204 million dollar mablag‘ ajratgani to‘g‘risida xabar berilgandi.
