Biz tinchlikni jang maydonida qo‘lga kiritishimiz kerak — Dmitriy Kuleba
Ukraina TIV rahbari qurolli mojaroni hal etishda diplomatiyaning foydasi yo‘qligini maʼlum qildi.
Ukraina tashqi ishlar vaziri Dmitriy Kulebaning fikricha, diplomatiya mamlakatdagi nizoni hal etish uchun eng asosiy vosita hisoblanmaydi. Bu haqda u BBC‘ga bergan intervyusida aytgan.
“Tan olishim kerak, hozirgi vaziyatda diplomatiya mojaroning hal etilishining asosini tashkil etmaydi. Biz tinchlikni jang maydonida qo‘lga kiritishimiz kerak”, – degan Ukraina bosh diplomati.
U, shuningdek, Buchada sodir bo‘lgan fojialardan so‘ng G‘arb Kiyevni barcha zarur qurol-yarog‘ vositalari bilan taʼminlashi shartligini qo‘shimcha qilgan.
Avvalroq Kuleba Germaniyani Ukrainani yetarli darajada qo‘llab-quvvatlamayotganini aytgandi.
