Ukraina Moskvani Misrni g‘allasiz qoldirishda aybladi
Misr dunyoning eng yirik bug‘doy import qiladigan davlatlaridan biri.
Ukrainaning Qohiradagi elchixonasi Rossiyani Misr uchun bug‘doy ortilgan kemani ushlab qolishda aybladi. Bu haqda elchixonaning rasmiy Twitter akkauntida maʼlum qilingan.
"Rossiya Misrga tomon ketayotgan va Ukraina g‘allasi ortilgan kemani bloklab qo‘ydi", — deyiladi bayonotda. Kema Marine Traffic portali tomonidan kuzatilgan. Unga Panama bayrog‘i ostidagi Emmakris III kemasi hamrohlik qilmoqda. Hozirda u Chernomorskda turibdi. Kema 22 fevraldan beri shu joydan qo‘zg‘almagan.
O‘z navbatida RFning Misrdagi elchixonasi bu ayblovlarni rad etdi. Unga ko‘ra, Odessa va Chernomorskdagi kemalarni Ukrainaning o‘zi ushlab turibdi.
Maʼlumotlarga ko‘ra, g‘alla Misr tomonidan 15 fevraldan 3 martga qadar sotib olingan 300 ming tonna bug‘doyning bir qismi hisoblanadi.
Misr dunyoning eng yirik don isteʼmolchilaridan biri. Mamlakat har yili 11 million tonna bug‘doy import qiladi, jami isteʼmol ko‘rsatkichi — 18 million tonna. Ushbu arab davlatiga asosiy eksportyor davlatlar Rossiya va Ukraina hisoblanadi. Xususan, 2021 yil Moskva Qohiraga 8.2 million tonna bug‘doy sotgan (importning 74.5 foizi). Ukraina ulushi 20 foizni tashkil etadi.
Avvalroq Jahon savdo tashkiloti dunyoda jiddiy oziq-ovqat tanqisligi bo‘lishidan ogohlantirgandi.
