Minskdan Toshkentga uchgan samolyot bomba xavfi sabab favqulodda qo’ndi
“Uzbekistan airways” holat yuzasidan rasmiy izoh berdi.
Aviakompaniya axborot xizmatining ma’lum qilishicha, bugun, 11-aprel kuni “Minsk–Toshkent” yo‘nalishi bo‘yicha uchuvchi aviareys 15:39 da Minsk milliy aeroportidan jadvalga muvofiq aviaqatnovni amalga oshirishni boshlagan. “A320” havo kemasi Rossiya havo hududida bo‘lgan vaqtda “Uzbekistan Airways” AJ, shuningdek, Rossiya va Belorussiya aviatsiya xizmatlari xodimlarining e-mail manzillariga anonim manzildan havo kemasida bomba joylashgani haqida ma’lumot yuborilgan.
Havo kemasining yo‘lovchilari va ekipaj a’zolari xavfsizligini ta’minlash maqsadida, “A320” havo kemasi komandiri samolyotni tekshirish va ko’zdan kechirish maqsadida eng yaqin Domodedovo xalqaro aeroportiga qo‘nishga qaror qilgan. Ayni paytda layner, yo‘lovchilar, ularning yuklari, yuk va pochta belgilangan tartibda tekshirildi. Havo kemasining minalashtirilgani haqidagi ma’lumot tasdiqlanmagan.
