Pokiston “Tolibon”ga talab qo‘ydi
Bu terrorchilar hujumi bilan bog‘liq.
Pokiston tashqi ishlar vazirligi rasmiy vakili Asif Iftixor toliblardan o‘z hududiga bo‘layotgan hujumlarni to‘xtatishni talab qildi. Bu haqda “Sputnik Afganistan” xabar berdi.
Iftixor terrorchilar Afg‘oniston hududidan Pokiston harbiylariga hujum uyushtirish uchun foydalanayotganini qayd etgan. Uning qo‘shimcha qilishicha, bu holat ayniqsa so‘nggi kunlarda ko‘paygan.
Iftixor bir necha oylik muzokaralar natija bermaganini maʼlum qilgan. Terrorchilar, xususan “Tahriki Tolibon Pokiston” jangarilarining harbiylarga hujumi kuchaygan. U bu kabi hodisalar mintaqada tinchlik va barqarorlik o‘rnatishga jiddiy to‘siq ekanini taʼkidlagan.
Avvalroq afg‘on-Pokiston chegarasida harbiy to‘qnashuv sodir bo‘lgani to‘g‘risida xabar berilgandi.
