Vashington Rossiya g‘allasi eksportiga qarshi emas
Bu hech qaysi sanksiyalarni buzmasligi maʼlum bo‘ldi.
Vashington Rossiyaning global bozorga oziq-ovqat mahsulotlari yetkazib berishiga to‘sqinlik qilmaydi. Bu haqda AQSH prezidentining milliy xavfsizlik bo‘yicha maslahatchisi o‘rinbosari Jonatan Fayner maʼlum qildi.
"Biz Ukrainaning ko‘proq mahsulot eksport qilishi yo‘llarini qidiryapmiz. Ochig‘ini aytganda, Rossiyaning don va boshqa maxsulotlarni sotishiga qarshi emasmiz. Tijoriy tashkilotlarning RFdan g‘allani hech qaysi sanksiyalarni buzmasdan import qilishlarini tushuntirishga harakat qilyapmiz", — degan u.
Faynerning so‘zlariga ko‘ra, hozirda Ukraina bug‘doyini olib chiqishning uchta yo‘li bor: G‘arbga temiryo‘l va avtomobil transporti orqali, shimoldan Belarus orqali hamda Qora dengiz orqali. Shu bilan birga Belarus orqali olib chiqish muammoli, chunki Kiyev va Minsk o‘rtasidagi munosabatlar yaxshi emas. Siyosatchining so‘zlariga ko‘ra, eng optimao variant — Odessa portlari orqali eksportni amalga oshirish.
Avvalroq Odessa portidan uch xavfsizlik yo‘lagi ochilishi va shu orqali don eksporti amalga oshirilishi to‘g‘risida xabar berilgandi.
