Ozarbayjon va Armaniston o‘rtasida yana mojaro boshlandimi?
Ikki tomon bir-birini o‘t ochishda ayblamoqda
15-iyul, shanbaga o‘tar kechasi Ozarbayjonning Armaniston bilan chegaradagi pozitsiyalari arman tomonidan intensiv o‘qqa tutildi, deb xabar bermoqda Ozarbayjon Mudofaa vazirligi.
“Ozarbayjon armiyasining Kalbajar viloyatining Zaylik aholi punkti yo‘nalishida joylashgan pozitsiyalariga turli o‘qotar qurollardan hujum qilindi”, — deyiladi harbiy departament xabarida.
Mudofaa vazirligining qo‘shimcha qilishicha, Ozarbayjon armiyasi tomonidan ko‘rilgan tegishli javob choralari natijasida dushman harakati bostirilgan.
Armaniston Mudofaa vazirligi ham Ozarbayjon tomoni chegaraning sharqiy yo‘nalishida arman harbiylarining pozitsiyalarini o‘qqa tutayotgani haqida xabar bergan. Vazirlik xabariga ko‘ra, chegara hududlarini o‘qqa tutish shanbaga o‘tar kechasi va yirik kalibrli o‘q otish qurollaridan amalga oshirilgan.
