Rossiya Ukraina bilan muzokara o‘tkazishga tayyor emas — Davlat departamenti
Avvalroq Putin Kiyevni erishilgan kelishuvlarni bajarmaslikda ayblagandi.
Rossiyaning Ukraina bilan muzokara o‘tkazishga tayyorligi to‘g‘risida belgilar yo‘q. Bu haqda AQSH davlat departamenti matbuot kotibi Ned Prays maʼlum qildi.
“Hozircha biz ularning real diplomatiyaga o‘tish bo‘yicha hech qanday harakatlarini ko‘rmadik”, – degan u.
Diplomatning qo‘shimcha qilishicha, Moskva o‘z yondashuvini o‘zgartirmas ekan, AQSH va uning ittifoqchilari Kiyevga harbiy yordam berishda davom etadi.
Rossiya va Ukraina 28 fevraldan buyon muzokara o‘tkazib keladi. Uning dastlabki raundlari Belarusda bo‘lib o‘tgan. Mart oxirida tomonlar Istanbulda uchrashgandi.
Avvalroq Vladimir Putin Ukrainaning muzokara o‘tkazish va kelishuvlarga amal qilish istagi yo‘qligini aytgandi.
