Toshkent aeroportida bepul WI-FI ishga tushirildi
Majmuaning jo‘nab ketish va uchib kelish zallari to‘liq internet bilan qamrab olingan.
Toshkent xalqaro aeroportida yo‘lovchilar va mehmonlar uchun internet tarmog‘iga ulanish uchun Wi-Fi tarmog‘i ishga tushirildi. Bu haqda aviakompaniya matbuot xizmati ma’lum qildi.
“O‘zbektelekom” kompaniyasi bilan birgalikda aloqa kanallarini ulash va jihozlarni o‘rnatish bo‘yicha barcha ishlar yakunlangan. Terminal majmuasining butun hududi — Wi-Fi tarmog‘i bilan jo‘nab ketish va uchib kelish zallari to‘liq qamrab olingan.
Internetga ulanish uchun ayeroportga tashrif buyuruvchilar #TASAirportUzcloud Wi-Fi tarmog‘ini qidirib topishi va “Ulanish” tugmasini bosishi kifoya. Tizim foydalanuvchilarni avtorizatsiya sahifasiga yo‘naltiradi va u yerga mobil telefon raqamni kiritish kerak bo‘ladi. Avtorizatsiyani tasdiqlash uchun ko‘rsatilgan raqamga SMS xabar yuboriladi.
Shundan so‘ng tizim pulli va bepul kirish imkoniyatlarini taklif etadi. Agar tizimdan bepul foydalanish tanlansa, tizim uchta qisqa reklamani ko‘rsatadi, so‘ng internetga kirishni ta’minlaydi. Pullik xizmat tanlansa, tizim tegishli tarif rejasini tanlashni taklif qiladi va to‘lov amalga oshirilgandan so‘ng tarif rejasiga muvofiq vaqt uchun cheksiz internetga kirish taqdim etiladi.
