Uzbekistan Airways‘ning ayrim samolyotlari sotiladi
Sotilmoqchi bo‘lgan samolyotlar 1989 va 2013-yillar oralig‘ida ishlab chiqarilgan.
“Uzbekistan Airways” AJ ayrim samolyotlari sotuvga qo‘yilmoqda. Bu bo‘yicha Davlat aktivlarini boshqarish agentligi “Uzbekistan Airways” AJning ayrim samolyotlari turi va rusumini inobatga olib, lotlarga bo‘lgan holda sotish jarayonlarini tashkillashtirish uchun xususiylashtirish bo‘yicha professional konsalting kompaniyasi tanlab olinishi yuzasidan tanlov eʼlon qildi.
Barcha qiziqish bildirgan talabgorlardan Taklif taqdim etish uchun so‘rovnomaga (RfP) asosan tijorat takliflarini joriy yil 29 avgust kuni soat 18:00 (Toshkent vaqti bilan)ga qadar taqdim etishlari so‘raladi.
Qayd etilishicha, 1989-va 2013-yillar oralig‘ida ishlab chiqarilgan jami 19 ta samolyot sotilishi rejalashtirilgan.
Bitim bo‘yicha ishlar Konsultant, Buyurtmachi va Sotuvchi vakillari o‘rtasida yaqin hamkorlikda amalga oshirilishi kutilmoqda.
Samolyotlar (18 ta havo kemalari va 1 ta simulyator) 6 ta lotlarga bo‘lingan. Shu bilan birga konsultantning tavsiyalari asosida bozor talablari va tahlil natijalariga muvofiq lotlar tarkibi o‘zgartirilishi mumkin.
