Toshkent – London aviareysidagi yuklar manziliga yetkazilmadi
Aviakompaniya holat yuzasidan izoh berdi.
Kecha, 28-avgust kuni Toshkent – London yo‘nalishidagi HY-201 aviaqatnovida yo‘lovchilar yuklari o‘z manziliga yetkazilmadi. Holat yuzasidan “Uzbekistan Airways” AJ axborot xizmati rasmiy bayonot e’lon qildi.
Bunga Airbus 320neo havo kemasining cheklangan tijorat yuklanishi sabab bo‘lgan. Bortga yuklanmagan yuklarning umumiy soni 119 o‘rinni tashkil etadi, bu esa 2210 kg miqdorida bo‘lganligini anglatadi. Ayni paytda HY-201 reysi yo‘lovchilarining yuklari Islom Karimov nomidagi Toshkent xalqaro aeroportida joylashgan bo‘lib, 30-avgust kuni HY-201 reysi bilan Londonga yetkaziladi.
Ta’kidlanishicha, yuk barcha yo‘lovchilarga yetkazib berish xizmati tomonidan ko‘rsatilgan manzilga bepul yetkazib beriladi.
“Keltirilgan noqulayliklar uchun uzr so‘raymiz”, — deyiladi xabarda.
