Lola Yo‘ldosheva UNESCO elchisi bo‘ldi
“Bu men uchun katta mas’uliyat va muhim missiya”, — deydi xonanda.
Xonanda Lola Yo‘ldosheva 14-16-noyabr kunlari Toshkentda bo‘lib o‘tadigan UNESCO'ning “Erta yoshdagi bolalarni tarbiyalash va ta’lim berish” bo‘yicha II Butunjahon konferensiyasining elchisi etib tayinlandi. Bu haqda “Uzreport” nashri yozmoqda.
Qayd etilishicha, 12-oktyabr kuni vazir Agrippina Shin unga elchilik sertifikatini topshirgan.
“Maftunkor xonandamiz bu vazifa uchun munosib nomzod. Vazirligimiz o‘z faoliyatini boshlagan dastlabki davrda tashkil etgan tadbirlarimizdanoq Lola biz bilan birga. Menimcha, u bizning vazirlik tizimidagi eng go‘zal va maftunkor qiyofa”, — deya ta’kidlagan vazir.
Xonanda esa o‘z Instagram sahifasida konferensiya elchisi bo‘lish u uchun mas’uliyatli va muhim vazifa ekanini yozib qoldirgan:
“Bu men uchun katta mas’uliyat va muhim missiya. Umid qilamanki, yuqori daraja va keng miqyosdagi bunday anjuman kuzatuvchilarimni maktabgacha ta’limning mamlakatimiz uchun alohida ahamiyatga ega ekaniga ishontirishga yordam beradi.
O‘zbekiston bu yil global voqealar xaritasida muhim nuqtaga aylandi. Men g‘urur bilan maktabgacha ta’lim sohasi rivojlanishi uchun dunyoga yangi turtki beradigan jamoa a’zosiga aylandim”, — deya izoh qoldirgan xonanda.
