Germaniya TIV rahbari O‘zbekistonga keladi
Annalena Berbok tashrif davomida ikki davlat hamkorligida tashkil etilgan markazlarga borishni ham maqsad qilgan.
Germaniya TIV matbuot kotibi xabar berishicha, mamlakat tashqi ishlar vaziri Annalena Berbok 30 oktyabr kuni O‘zbekiston va Qozog‘istonga tashrif buyuradi.
Berbok Ostonada o‘z hamkasbi Muxtor Tleuberdi bilan muzokaralar o‘tkazishni rejalashtirgan. Shuningdek, vazir Toshkentda mamlakat tashqi ishlar vaziri Vladimir Norov bilan muzokaralar o‘tkazish hamda Germaniya-O‘zbekiston taʼlim markaziga tashrif buyurishni maqsad qilgan. Keyingi manzil Samarqand shahri bo‘lib, unda Berbok Germaniya ko‘magida qurilayotgan irrigatsiya tizimlarini borib ko‘radi.
Vazirga energetika va infratuzilma sohasi mutaxassislari delegatsiyasi hamrohlik qiladi, deya xabar berdi Germaniya TIV.
Berbok Markaziy Osiyo respublikalariga tashrifidan so‘ng Germaniyaning Myunster shahrida bo‘lib o‘tadigan "Katta yettilik" mamlakatlari tashqi ishlar vazirlari sammitiga boradi. Unda Rossiyaning Ukrainaga bostirib kirishi, Xitoy va Eron bilan munosabatlari muhokama mavzusiga aylanishi aytilmoqda. Xususan, Markaziy Osiyo va Afrika davlatlari bilan aloqalarni rivojlantirish masalalari ham kun tartibida ko‘rib chiqiladi. Sammitda Afrika tashqi ishlar vazirlari va Afrika ittifoqi vakillari ishtirok etishi kutilmoqda.
