ISW: Putin yadro zarbasiga emas, uzoq davom etadigan nizoga tayyorgarlik ko‘rmoqda
Rossiya Prezidentining Ukrainadagi strategiyasi taxmin qilindi.
Amerika Urushni o‘rganish instituti (ISW) Ukrainadagi harbiy mojaro yuzasidan navbatdagi hisobotini eʼlon qildi.
Ekspertlarning taxminiga ko‘ra, Rossiya Prezidenti yadro zarbalariga emas, oddiy qurollar bilan uzoqqa cho‘ziladigan mojaroga tayyorlanmoqda. Bundan tashqari, asosiy eʼtibor Ukrainaning bosib olingan hududlarini qo‘lda saqlab qolish va yangi hududlarni egallashga qaratiladi.
Bunga Putin tomonidan o‘tkazilgan qisman harbiy safarbarlik misol bo‘la oladi.
“Ushbu safarbarlik unga ichki siyosatda qimmatga tushdi: yuz minglab odamlar boshqa davlatlarga qochib ketdi, misli ko‘rilmagan namoyishlar bo‘ldi va Rossiya harbiy-siyosiy doiralarining keskin tanqidlari ko‘paydi. Ammo agar Putinda mojaroni davom ettirish istagi bo‘lsa, bu tovonni to‘lashdan maʼno bor. U Ukrainaga qo‘shimcha kuchlar jo‘natish zarurligini anglamoqda”, – deb qayd etgan hisobot mualliflari.
Ularning fikricha, Rossiya yangi safarbar qilinganlar bilan mavjud pozitsiyalarni saqlab qolmoqchi. Bahorda esa ancha yaxshi tayyorgarlikdan o‘tgan kuchlar bilan yangi hujumlarni boshlash mumkin bo‘ladi.
Shu bilan birga Putin sovuq qish ayrim Yevropa davlatlarining Ukrainaga beradigan yordamini qisqarishiga olib kelishiga umid qilayotgani taxmin qilingan.
