O‘zbekistonlik deputatlar Germaniya Bundestagi faoliyati bilan tanishmoqda
Ayni kunlarda Parlament a’zolari amaliy tashrif bilan mamlakatda bo‘lib turibdi.
O‘zbekiston Respublikasi Oliy Majlisi Qonunchilik palatasi deputatlari va Devon xodimlari hamda Qonunchilik muammolari va parlament tadqiqotlari instituti vakillaridan iborat delegasiya amaliy tashrif bilan Germaniyaga bordi.
Tashrif doirasida O‘zbekiston parlamenti a’zolari Germaniya Bundestagi faoliyatini tashkil etish tajribasi, jumladan, uning boshqaruvi, ilmiy xizmati, doimiy komissiyalari, parlament nazorati va murojaatlar organlari, kutubxonalar va boshqa tuzilmalari faoliyati bilan yaqindan tanishadi.
Shuningdek, partiya fraksiyalari, ixtisoslashtirilgan qo‘mitalar faoliyati, Bundestag va saylov okruglaridagi yalpi majlislar jarayoni bilan tanishishi rejalashtirilgan.
Ta’kidlanishicha, so‘nggi besh yilda parlament delegasiyalarining 10 dan ortiq tashriflari amalga oshirilgan. Germaniya parlamenti a’zolari O‘zbekistonda amalga oshirilayotgan siyosiy-huquqiy islohotlar bilan bog‘liq dolzarb masalalarga bag‘ishlangan turli anjuman, forum va boshqa tadbirlarda muntazam ishtirok etib kelmoqda.
O‘zbekiston Respublikasi Oliy Majlisining Germaniya Bundestagi bilan hamkorlik bo‘yicha parlamentlararo guruhi va Bundestagning “Germaniya – Markaziy Osiyo” Parlament guruhi ikki tomonlama hamkorlikni rivojlantirishga katta hissa qo‘shmoqda.
