Nosozliklarga ham o‘rganib qoldik: metroning “Pushkin” bekatida poyezd to‘xtab qoldi
“Toshkent metropoliteni” doimgidek uzr so‘rash bilan kifoyalandi.
“Chilonzor” yo‘nalishidagi “Pushkin” bekatiga 14 dekabr kuni soat 08:00 atrofida kirib kelgan poyezd nosozlik sabab to‘xtab qoldi. Holat yuzasidan “Toshkent metropoliteni” axborot xizmati maʼlumot berdi.
Qayd etilishicha, 2-sonli harakat tarkibining ayrim yoritish moslamalarida qisman nosozlik holati kuzatilgan. Mashinist tomonidan belgilangan yo‘riqnomaga asosan fuqarolar va harakat xavfsizligini taʼminlash maqsadida yo‘lovchilar bekatga tushirilib, soat 08:05 da ushbu poyezd tekshiruv punkti tomon harakatlangan.
"Hozirgi vaqtda barcha poyezdlar belgilangan jadval asosida harakatlanmoqda. Keltirilgan noqulaylik yuzasidan barcha yo‘lovchilardan uzr so‘raymiz", — deyiladi xabarda.
