O‘tgan oyda inflyatsiya miqdori qanday bo‘ldi?
Markaziy bank maʼlumotlarni ochiqladi.
Bugun, 15-dekabr kuni Markaziy bank boshqaruvi yig‘ilishi bo‘lib o‘tdi.
Unda jahon bozorida asosiy oziq-ovqat tovarlari va energiya resurslari narxida muvozanatlashuv kuzatilayotgan bo‘lsa ham, ichki bozorda narxlarga bo‘lgan bosimlar saqlanib qolayotgani taʼkidlandi. Aholi inflyatsion kutilmalari, umumiy inflyatsiyaning so‘nggi 3-4 oyda sezilarli o‘zgarmaganligi va ayni paytda bazaviy inflyatsiyaning o‘suvchi trendi iqtisodiyotda “nisbatan qatʼiy” pul-kredit sharoitlarini saqlab qolishni taqozo etmoqda.
Yig‘ilishda belgilangan asosiy stavka dinamikasidan kelib chiqib shakllanadigan pul-kredit sharoitlari inflyatsiyani keyingi yilgi prognoz darajasiga pasaytirishga zamin yaratib boradi.
Inflyatsiya va inflyatsion kutilmalar. Isteʼmol bozorlarida talab va taklifga taʼsir ko‘rsatuvchi ichki va tashqi iqtisodiy omillar hisobiga narxlarga bo‘lgan bosim yuqoriligicha qolmoqda.
Noyabr oyida yillik inflyatsiya surʼati 12,3 foizni tashkil etdi. Yillik inflyatsiya tarkibida oziq-ovqat mahsulotlari narxlari
16,0 foizga oshgan bo‘lsa, nooziq-ovqat tovarlari va xizmatlar mos ravishda 10,7 va 7,8 foizga qimmatlashdi.
O‘tgan oy natijalariga ko‘ra, aholining kelgusi 12 oy uchun inflyatsion kutilmalari 15,3 foizni, tadbirkorlarning kutilmalari esa 14,3 foizni tashkil etgani holda o‘tgan oylar darajasida qolmoqda.
Shuningdek, yillik bazaviy inflyatsiya noyabrda 13,4 foizgacha tezlashib, uning umumiy inflyatsiyadagi hissasi 10,1 foiz bandgacha oshdi.
