Farg‘onada 3 yoshli bola “Dok-1 Maks”dan zaharlandi
Viloyat SSB boshlig‘i uning ahvoli haqida maʼlumot berdi.
Farg‘ona viloyatida 3 yoshli bola “Dok-1 Maks” siropini ichishi natijasida zaharlandi. Bu haqda viloyat sog‘liqni saqlash boshqarmasi boshlig‘i Abduqayum To‘xtaqulov maʼlum qildi.
Bugungi kunda bolalarni tabletka va sirop dori vositalaridan zaharlanishini oldini olish maqsadida viloyatdagi barcha davolash profilaktika muassasalariga «Dok-1 Maks» preparatlaridan saqlanish bo‘yicha topshiriqlar berilgan. Shuningdek, tarkibida paratsetamol saqlaydigan yoki boshqa dori preparatlarini zaharlanib murojaat qilgan bolalar to‘g‘risidagi maʼlumotlar zudlik bilan viloyat sog‘liqni saqlash boshqarmasiga xabar berish, yosh bolalari bo‘lgan oilalarga ko‘rsatilayotgan patronaj xizmati kuchaytirilishi yo‘lga qo‘yilgan.
“Respublika shoshilinch tibbiy yordam ilmiy markazi Farg‘ona filialining bolalar reanimatsiya bo‘limida “Dok 1 Maks” siropini ichishi natijasida Quvasoy shahrida yashovchi 3 yoshli bemor bola doridan o‘tkir zaharlanish tashxisi bilan davolanmoqda. Uning umumiy ahvoli og‘ir, hushida. Bemorga tasdiqlangan davolash standarti asosida davo muolajalari olib borilmoqda. Viloyatdagi vaziyatni shaxsan o‘zim nazoratga olganman”, — deydi boshqarma boshlig‘i.
