"Bu biznesni emas, isteʼmolchilarni jazolash" — Otabek Bakirov
Iqtisodchi metan bilan bog‘liq qatʼiy cheklovlar amal qilayotgan bir sharoitda benzin savdosi bilan shug‘ullanadigan AYOQSHlarning yopilishi juda katta xatoligini aytmoqda.
Iqtisodchi Otabek Bakirov telegram kanalida 109 ta AYOQSHga benzin sotishda aniqlangan qoidabuzarliklar uchun benzin yetkazib berishning to‘xtatilishi va xuddi mana shunday choralar o‘tgan yili dekabrda ham qo‘llanilgani haqida yozdi.
"Metan bilan bog‘liq qatʼiy cheklovlar amal qilayotgan bir sharoitda benzin savdosi bilan shug‘ullanadigan AYOQSHlarning yopilishi juda katta xato. Chunki o‘zi busiz ham juda ko‘p hududlarimizda benzin sotuvchi AYOQSHlar juda kam. Ayrim tumanlarda bitta yo ikkita AYOQSH faoliyat ko‘rsatadi.
Eʼtibor qiling, Samarqand viloyatida naq 26ta, Farg‘ona viloyatida esa 22ta AYOQSHga benzin yetkazish to‘xtatilgan. Viloyatlar qirqimida aniq statistika yo‘q, lekin kuzatishlarimga ko‘ra, kamida mazkur viloyatlardagi AYOQSHlarning kamida uchdan birini tashkil etishi mumkin. Balki ayrim tumanlarda ishlaydigan bironta AYOQSH ham qolmagan bo‘lishi ehtimoldan holi emas.
Bu bilan qoidabuzarliklar jazolanmasin demayapman, lekin jazo shakli boshqacharoq, balki moliyaviy bo‘lishi kerak va bu jazo AYOQSH faoliyatini to‘xtab qolishi oqibatlarini yaratmasligi zarur. Ayniqsa hozir, ayniqsa viloyatlarda. Aks holda bu isteʼmolchilarni jazolash bo‘ladi, qoidabuzar biznesni emas", — deydi iqtisodchi.
