“Azal” aviakompaniyasi Bokudan Urganchga parvozlarni boshladi
Muntazam reyslar haftada bir marta amalga oshiriladi.
Kecha, 28 yanvar kuni mahalliy vaqt bilan soat 22:33 da Ozarbayjonning “Azal” aviakompaniyasining samolyoti Urganchga kelib qo‘ndi. Bu haqda “Uzbekistan Airports” xabar bermoqda.
Bortida 99 nafar yo‘lovchisi bo‘lgan Airbus A319 samolyoti anʼanaga ko‘ra tantanali ravishda kutib olingan. Muntazam reyslar haftada bir marta — shanba kunlari amalga oshirilishi rejalashtirilgan.
Eslatib o‘tamiz, Urganch Ozarbayjon aviatashuvchisi parvoz qila boshlagan O‘zbekistondagi to‘rtinchi shahar bo‘ldi. Bokudan Toshkentga reyslar haftasiga ikki marta — payshanba va yakshanba kunlari muntazam ravishda amalga oshiriladi. Bokudan Samarqandga — seshanba va payshanba kunlari. Bokudan Farg‘onaga — payshanba kunlari.
1992 yilda tashkil etilgan Ozarbayjon Havo Yo‘llari (Azal) aviakompaniyasi yirik aviatashuvchi bo‘lib, Boeing va Airbus samolyotlarining zamonaviy parkiga ega bo‘lgan MDH mamlakatlari aviatsiya hamjamiyatidagi yetakchilardan biri hisoblanadi.
