6 mingga yaqin davlat xizmatchilari birlamchi tibbiy ko‘rikdan o‘tkazildi
Hokimlik xodimlari o‘rtasida ovqat hazm qilish organlari, yurak qon tomir, asab tizimi, ko‘z va endokrin kabi kasalliklar aniqlandi.
Davlat xizmatini rivojlantirish agentligi, Cog‘liqni saqlash vazirligi hamda hokimliklar bilan hamkorlikda Qoraqalpog‘iston Respublikasi Vazirlar Kengashi va barcha hokimliklarda faoliyat yuritayotgan jami 5 744 nafar davlat fuqarolik xizmatchilarini tibbiy ko‘rikdan o‘tkazishdi.
Xizmatchilar 10 dan ortiq turdagi birlamchi tibbiy ko‘rikdan o‘tkazildi.
Tibbiyot xodimlarining xulosalariga ko‘ra, hokimlik xodimlari o‘rtasida ovqat hazm qilish organlari (surunkali gastrit), yurak qon tomir (arterial gipertoniya), asab tizimi (osteoxondroz), ko‘z va endokrin (qandli diabet va semizlik) kabi kasalliklar aniqlandi.
Kasallik aniqlangan xodimlarga davolanishi uchun barcha zarur shart-sharoitlarni yaratish choralarini ko‘rish bo‘yicha Qoraqalpog‘iston Respublikasi Vazirlar Kengashi, viloyatlar va Toshkent shahar hokimliklariga tegishli ko‘rsatmalar yuborildi, jarayon davom etmoqda.
Eslatib o‘tamiz, “Davlat fuqarolik xizmati to‘g‘risida”gi qonunda davlat fuqarolik xizmatchisiga tibbiy xizmat ko‘rsatish ijtimoiy himoya chorasi sifatida kafolatlangan.
