Qo‘qon bozoridagi yong‘in bo‘yicha jinoyat ishi qo‘zg‘atildi
Bu haqda Bosh prokuratura matbuot kotibi xabar berdi.
Bosh prokuratura matbuot kotibi Hayot Shamsuddinovning maʼlum qilishicha, Qo‘qondagi savdo komplekslarida sodir bo‘lgan yong‘in bo‘yicha Jinoyat kodeksining 259-moddasi (Yong‘in xavfsizligi qoidalarini buzish) bilan jinoyat ishi qo‘zg‘atildi.
«Hozirda Farg‘ona viloyati IIB huzuridagi Tergov boshqarmasi tomonidan tergov harakatlari olib borilmoqda», — deyiladi xabarda.
Eslatib o‘tamiz, Favqulodda vaziyatlar vazirligiga ko‘ra, Qo‘qon shahridagi «Buyuk Ipak yo‘li» bozoridagi yong‘in haqida dushanba kuni soat 19:17 da xabar kelib tushgan. 10 ta yong‘in-qutqaruv ekipaji soat 19:25 da voqea joyiga yetib borib, yong‘in o‘chirishga kirishgan.
Jabrlangan haqida maʼlumot eʼlon qilinmayapti. Soat 20:37 da FVV yong‘in qurshab olingani va uni to‘liq bartaraf etish choralari ko‘rilayotganini maʼlum qildi. Soat 23:12 da vazirlik yong‘inni o‘chirish jarayoni aks etgan lavhalarni eʼlon qildi.
