Ikkinchi bor ota bo‘lgan Neymar "PSJ"dan ketmoqchi emas
Uni hozirgi 25 million yevrolik maosh qoniqtiradi.
“PSJ”ning braziliyalik hujumchisi Neymar yozgi transfer oynasida Fransiya klubini tark etish niyatida emas. “L‘Équipe” nashrining yozishicha, Neymarning qaroriga ko‘p omillar sabab bo‘lgan: braziliyalik Parijda o‘zini qulay his qilmoqda, futbolchi yaqinda ikkinchi marta ota bo‘ldi, uni hozirgi 25 million yevro maoshi qoniqtirmoqda. Bundan tashqari, yulduz forvard mavsumni jarohatlarsiz o‘tkazish va “PSJ” bilan Chempionlar ligasida g‘olib chiqishni istamoqda.
Neymar avvalroq “PSJ”da qolish istagini bildirgan edi. Braziliyalik futbolchi 2017-yildan buyon fransuz klubida o‘ynab kelmoqda. Futbolchining parijliklar bilan shartnomasi 2025-yilgacha mo‘ljallangan. Neymar joriy mavsumda “PSJ” safida barcha turnirlar doirasida 29 ta o‘yinda maydonga tushib, 18 ta gol urdi va 17 ta golli uzatmaga mualliflik qildi.
