Rossiyada qariyb 500 kg kokain bilan ushlangan shaxslar oqlandi
Moskva shahar sudi Ekvadordan Sankt-Peterburgga 472 kilogramm kokain olib o‘tishda ayblanganlarni oqladi.
Moskva shahar sudi Ekvadordan 472 kilogramm kokainni Sankt-Peterburg porti orqali olib o‘tish bo‘yicha 2019-yilda qo'lga olingan Litvaning uch fuqarosi va ikki nafar rossiyalikni oqladi, deb yozadi “Vedomosti".
Gumonlanuvchilar Ernestas Kazlauskas, Mindaugas Koretsas, Igoris Grigas, Georgiy va Ivan Radomirovlar giyohvand moddalar yetkazib berish maqsadida uyushgan jinoiy guruh tuzishda ayblangan. Ularga umrbod qamoq jazosi bilan tahdid qilingan.
Kontrabanda ishi ko'rib chiqqan hakamlar hay’atining fikricha, uyushgan jinoiy guruh tuzish nuqtai nazaridan hech qanday jinoiy hodisa yuz bermagan va ayblanuvchilarning giyohvand moddalar kontrabandasiga aloqadorligi isbotlanmagan.
Natijada ayblanuvchilar sud zalining o'zida qamoqdan ozod qilingan. Endilikda hukm qonuniy kuchga kirsa, ular reabilitatsiya va moddiy tovon puliga umid qilishlari mumkin.
