O‘zbekiston Belarus va Rossiyadagi saylovlar kuzatuvchisi bo‘lishi mumkin

 

O‘zbekiston kelasi yil Belarus va Rossiyada o‘tadigan saylovlarda kuzatuvchi sifatida ishtirok etishi kutilmoqda. Bu haqda Mustaqil Davlatlar Hamdo‘stligiga (MDH) aʼzo davlatlar saylov organlari rahbarlari Maslahatlashuv kengashining II yig‘ilishida maʼlum qilindi.

 

O‘zbekiston raisligida MDHga aʼzo davlatlar saylov organlari rahbarlari Maslahatlashuv kengashining II yig‘ilishi bo‘lib o‘tdi. Unda Armaniston, Belarus, Qirg‘iziston, Tojikiston, O‘zbekiston, Rossiya saylov organlari rahbarlari ishtirok etdi.

 

Mustaqil Davlatlar Hamdo‘stligiga (MDH) aʼzo davlatlar saylov organlari rahbarlari Maslahatlashuv kengashining II yig‘ilishi

 

MDH bosh kotibi o‘rinbosari Ilhom Neʼmatovning so‘zlariga ko‘ra, Kengash saylov tizimi va qonunlarni xalqaro standartlarga muvofiq takomillashtirish bo‘yicha tajriba almashish uchun yaxshi imkoniyat yaratmoqda.

 

Yig‘ilishda MDHga aʼzo davlatlar saylov organlari rahbarlari Maslahatlashuv kengashining reglamenti tasdiqlandi.

 

Hujjat besh bo‘limdan iborat. U kengashning ish tartibi, uning majlislarini tashkil etish va o‘tkazish, kengash ko‘rib chiqish uchun kiritiladigan hujjatlarni tayyorlash va qabul qilish, qarorlarning ijrosini taʼminlash tartibini belgilaydi.

 

“2024 yil 25 fevralda bo‘lib o‘tadigan Belarus respublikasi Milliy Assambleyasi Vakillar palatasining deputatlari saylovi hamda 17 martda bo‘lib o‘tadigan Rossiya Federatsiyasi prezidenti saylovini monitoring qilishda kengash aʼzolarining ishtiroki muhokama qilindi”, — deyiladi xabarda.

 

Kun tartibiga yoshlarni saylov jarayonlariga jalb etish masalasi ham kiritildi.

 

Qayd etilishicha, kengashning navbatdagi yig‘ilishi 2024 yilning ikkinchi yarmida Toshkentda o‘tkaziladi.