Tojikiston milliy jamoasi darvozaboniga avtomobil sovg‘a qilindi
U Osiyo kubogida ajoyib o'yin ko'rsatgandi.
Osiyo kubogi-2023 turnirida chorakfinalgacha yetib borgan Tojikiston milliy jamoasi mamlakatda tantanali kutib olindi. Tojikiston futbol federatsiyasi prezidenti Rustam Imomali qarori bilan milliy jamoaning Qatardagi muvaffaqiyatli ishtiroki inobatga olinib, jamoa jami 450 ming AQSH dollari pul mukofoti bilan taqdirlandi. Shuningdek, bir qator futbolchilar o‘zi tug‘ilib o‘sgan shahar va tuman hokimliklari, homiylar tomonidan alohida taqdirlangan.
"Istiqlol" futbol klubi xabariga ko‘ra, bugun Dushanbedagi "Toyota" avtosalonida Tojikiston milliy jamoasi darvozaboni Rustam Yatimovning Qatardagi muvaffaqiyatli o‘yini va BAAga qarshi nimchorakfinalida penaltilar seriyasidagi omadli harakatlari uchun unga 2023-yilda ishlab chiqilgan yangi "Toyota Corolla" avtomobilini sovg‘a qilingan.
Eslatib o‘tamiz, Tojikiston turnirdagi debyutida chorakfinalgacha yetib borib, yarimfinal yo‘llanmasi uchun bahsda Iordaniyaga minimal hisobda mag‘lub bo‘lib, turnirni tark etgandi.
