Marg‘ilonda daraxt kesgan fuqaro salkam 50 mln jarimaga tortildi
Unga, shuningdek, 100 tup ko‘chat ekish majburiyati yuklatilgan.
Marg‘ilon shahar bolalar shifoxonasi hududida daraxtlar daraxt kesgan fuqaro javobgarlikka tortildi.
Maʼlum bo‘lishicha, shifoxona hududida texnik xodim M.I. tomonidan bir tup o‘rmon fondiga kirmaydigan ko‘p yillik sasna daraxti hech qanday ruxsatnomasiz kesilgan.
Xodimga 18 mart kuni shahar ekologiya bo‘limi davlat inspektorlari tomonidan daraxtlarni kesmaslik to‘g‘risida ogohlantirish xati berilgan. Ammo xodim bunga amal qilmagan.
Daraxt kesilishi natijasida tabiatga 36 million 500 ming so‘m zarar yetkazilganligi maʼlum bo‘ldi. Shuningdek, huquqbuzarga nisbatan MJtKning 79-moddasi 1-qismiga asosan maʼmuriy bayonnoma rasmiylashtirilib, BHMning 25 baravari — 8 million 500 ming so‘m miqdorida jarima belgilandi. M. I. qilmishi uchun jami 45 million so‘m to‘laydigan bo‘ldi.
Shuningdek, Vazirlar Mahkamasining 2022 yil 28 avgustdagi "Davlat o‘rmon fondiga kirmaydigan daraxtlar va butalarni ekish, parvarish qilish va ulardan foydalanish tartibini yana-da takomillashtirish to‘g‘risida"gi 464-son qaroriga asosan huquqbuzarga 100 tup daraxt ko‘chatini kompensatsiya tarzida ekish hamda ularni kamida 3 yil parvarish qilish majburiyati yuklatildi.
