Qashqadaryolik fermerlarning 28 mlrd so‘mga yaqin subsidiya mablag‘lari undirib berildi

Biznes-ombudsmanga “Farovon” MCHJ (nomi o‘zgartirilgan) murojaat qilib, 2023 yilda paxta hosilini sug‘orish ishlarida foydalanilgan elektr-energiyasi uchun subsidiya mablag‘larini ajratishda amaliy yordam so‘ragan.

 

Vazirlar Mahkamasining 2018 yil 3 maydagi 320-son qarori bilan bu borada ajratiladigan subsidiyalarni ajratish tartibi tasdiqlangan.

 

Aniqlanishicha, tashkiliy-huquqiy ishlar yakuniga yetmagani sababli, 2023 yilda viloyatdagi tadbirkorlar ushbu subsidiyadan foydalana olmagan.

 

Prezidentning 2024 yil 5 yanvardagi qaroriga asosan qonunchilik hujjatlariga kiritilgan o‘zgartish va qo‘shimchalarga muvofiq 2023 yilda paxta xom ashyosi va g‘alla yetishtirishda nasos agregatlari va sug‘orish quduqlari isteʼmol qilgan elektr energiyasi qiymatining 50 foizini qoplab berish uchun subsidiyalar vakolatli davlat organlari va tashkilotlari tomonidan taqdim qilingan ekin maydonlarini sug‘orishga sarflangan suv miqdori uchun isteʼmol qilingan elektr energiyasi qiymati bo‘yicha hisob-kitoblariga asosan, istisno tariqasida, Qishloq xo‘jaligi vazirligi tomonidan 2024 yilda ajratib beriladi.

 

Qaror ijrosini taʼminlash maqsadida Qishloq xo‘jaligi vazirligi tomonidan 2024 yil 8 fevralda mutasaddi davlat organlari va tashkilotlarga tegishli maʼlumotlarni bir hafta muddatda taqdim qilish to‘g‘risida tegishli xat yuborilgan.

 

Shunga qaramasdan, maʼlumotlar vazirlikka taqdim qilinmagan.

 

Biznes-ombudsman qonuniy talablari asosida 2024 yil 6 aprelda zarur maʼlumotlar Qishloq xo‘jaligi vazirligiga taqdim qilinishi taʼminlandi.

 

Ushbu maʼlumotlar asosida kelgusida viloyatdagi 2000 dan ortiq tadbirkorlarga 28 mlrd so‘mga yaqin subsidiya mablag‘lari to‘lab beriladi.

 

Bundan tashqari, topshiriq ijrosiga masʼuliyatsiz yondashganligi sababli, viloyat qishloq xo‘jaligi boshqarmasi mansabdor shaxsi O.B.ga nisbatan Maʼmuriy javobgarlik to‘g‘risidagi kodeksining 197-3-moddasiga asosan jarima jazosi qo‘llanilishi taʼminlandi.