Majburiy avtosug‘urta tariflari oshishi mumkin
To‘lanishi mumkin bo‘lgan maksimal miqdor avtotransportga yetkazilgan zararlarni qoplashga yetarli bo‘lmayotgani aytilmoqda.
Istiqbolli loyihalar milliy agentligi tomonidan transport vositalari egalarining fuqarolik javobgarligini majburiy sug‘urta qilish bo‘yicha 2019 yilda tasdiqlangan sug‘urta tarifi miqdorini qayta ko‘rib chiqish ishlari olib borilmoqda. Bu haqda agentlik Matbuot xizmati xabar qildi.
Qayd etilishicha, sug‘urta tarifi miqdorini qayta ko‘rib chiqishga bir qator omillar sabab bo‘lmoqda. So‘ngi yillarda sug‘urta tashkilotlari tomonidan sug‘urta tovonlarini o‘z vaqtida to‘lanmayotgani hamda to‘lanishi mumkin bo‘lgan maksimal miqdor avtotransportga yetkazilgan zararlarni qoplashga yetarli bo‘lmayotganligi bo‘yicha transport vositalari egalarining murojaatlari soni ortib bormoqda.
Tahlillarga asosan 2019 yilda tasdiqlangan 56 ming so‘mlik sug‘urta mukofoti miqdori sug‘urta tashkilotlari uchun zararlarni qoplashga yetarli bo‘lmagani sababli turli xil yo‘llar bilan to‘lovlar kechiktirib kelinmoqda. Maʼlumot uchun, 2023 yilda Toshkent shahrida zararlilik darajasi 146 foizni tashkil etgan.
"Shuningdek, 2019 yildan boshlab barqaror belgilangan 40 mln so‘m sug‘urta summasi yo‘l-transport hodisalarida jabrlanuvchilarga yetkazilgan zararlar bo‘yicha xarajatlarini yetarli darajada qoplashga imkon bermay qolgan.
Mazkur muammoni yechimi sifatida asosli hisob-kitoblar natijasida, yaʼni transport vositalari egalari va sug‘urta tashkilotlari uchun maqbul sug‘urta tariflari va sug‘urta summasini belgilash rejalashtirilmoqda. Yangi sug‘urta tariflari va sug‘urta summasini belgilash yuzasidan taklif va mulohazalaringizni Nappconnectbot Telegram-botiga yuborishingizni so‘raymiz", — deyiladi xabarda.
