Messining goli jamoasini mag‘lubiyatdan qutqarib qololmadi
"Inter Mayami" 23-o'rindagi jamoaga imkoniyatni boy berib qo'ydi.
Kecha MLSning navbatdagi tur o'yini yakunlandi. Unda “Inter Mayami” “Atlanta Yunayted”ga 1:3 hisobida imkoniyatni boy berdi.
44-daqiqada gruziyalik yarim himoyachi Saba Lobjanidze uchrashuvda hisobni ochdi. Ikkinchi bo‘lim boshida yana o'sha gruzin futbolchisi dubl qayd etdi. Oradan 3 daqiqa o'tib mezbonlarning argentinalik hujumchisi Lionel Messi ispaniyalik yarim himoyachi Serxio Busketsning uzatmasidan so'ng hisobni qisqartirdi. Biroq, 73-daqiqada mehmonlarning senegallik hujumchisi Jamol Tiare “Inter Mayami” darvozasiga uchinchi golni urib, o'yinga nuqta qo'ydi.
Yulduzli futbolchilar Xordi Alba va Luis Suares asosiy tarkibda maydonga tushgan bo'lishiga qaramay jamoasiga yordam bera olmadi. MLS turnir jadvalida “Inter Mayami” 34 ochko bilan peshqadamlik qilmoqda. "Atlanta Yunayted" esa 16 ochko bilan turnir jadvalida 23-o'rinda bormoqda.
