Ilmiy tadqiqot: odat shakllanishi uchun qancha vaqt kerak?
Mutaxassislarga ko‘ra, insonda ertalabki odatlar tezroq shakllanadi.
Janubiy Avstraliya universiteti olimlari yangi odatlarni shakllantirish o‘rtacha 59–66 kunni talab qilishini aniqladi. Ammo bu odatni to‘liq avtomatizmga yetkazish uchun bir yilgacha vaqt ketishi mumkin.
2600 dan ortiq ishtirokchilar o‘rtasida o‘tkazilgan tajribada, odatlarning shakllanishiga taʼsir qiluvchi omillar aniqlandi. Bunga quyidagilar kiradi:
— Amalni bajarish tez-tezligi;
— Ushbu harakatga sarflangan vaqt;
— Jarayon davomida olingan zavq va ijobiy his-tuyg‘ular.
Tadqiqot shuni ko‘rsatdiki, ertalabki odatlar (masalan, uyg‘onishdan keyin bajariladigan ishlar) tezroq shakllanadi. Shuningdek, odat shakllanishi paytida his qilinadigan ijobiy emotsiyalar bu jarayonni sezilarli darajada tezlashtiradi. Ayrim hollarda, odatni avtomatlashtirish uchun 335 kungacha vaqt kerak bo‘lishi mumkin.
Olimlar bu maʼlumotlarni sog‘lom turmush tarzini shakllantirish va kasalliklarning oldini olishga qaratilgan dasturlarni ishlab chiqishda samarali asos sifatida qo‘llash mumkinligini taʼkidlashdi.
