Elektromobillar uchun utilizatsiya yig‘imi oshirilmoqda
Bu bo‘yicha hukumat qarori qabul qilindi.
Vazirlar mahkamasining "Elektrodvigatelga ega bo‘lgan transport vositalari akkumulyator batareyalarini utilizatsiya qilish infratuzilmasini tashkil etish ishlarini moliyalashtirish bo‘yicha qo‘shimcha chora-tadbirlar to‘g‘risi"dagi qarori qabul qilindi.
Unga ko‘ra, utilizatsiya yig‘imi (kodi TIF TN 8703 80) oshiriladi. Utilizatsiya yig‘imlari quyidagicha etib belgilandi:
— Ishlab chiqarilgan muddatidan boshlab 3 yildan ortiq bo‘lmagan elektromobillar uchun yig‘im BHMning 120 baravari — 45 million so‘m;
— Ishlab chiqarilgan muddatidan boshlab 3 yildan ortiq bo‘lgan elektromobillar uchun BHMning 210 baravari (78,75 million so‘m).
Iqtisodiyot va moliya vazirligi Investitsiyalar, sanoat va savdo vazirligi bilan birgalikda ikki oy muddatda ushbu qarorda belgilangan utilizatsiya yig‘imlarini yig‘ish hamda ulardan samarali foydalanish tartibini ishlab chiqadi.
Qaror mamlakatda “yashil” texnologiyalardan foydalanishni kengaytirish, elektromobillarning yaroqsiz holga kelib qolgan batareyalarini atrof-muhitga keskin zarar yetkazmagan holda utilizatsiya qilishni taʼminlash hamda sohada mahalliylashtirish ishlarini yana-da jadallashtirish maqsadida qabul qilingan.
