Braziliyada iqlim sammiti uchun o‘rmonlar kesilmoqda
Bu esa ekologlarning keskin noroziligiga sabab bo‘ldi.
Braziliya shu yilning noyabr oyida COP30 iqlim sammitiga mezbonlik qiladi. Ammo tadbirga tayyorgarlik ko‘rish jarayonida rasmiylar Amazon o‘rmonlarining muhofazalangan hududlarini kesib tashlash bilan shug‘ullanmoqda. Belem shahriga yo‘l qurish uchun minglab daraxtlar yo‘q qilinmoqda, bu esa ekologlarning keskin noroziligiga sabab bo‘ldi.
Mahalliy aholi va tabiat himoyachilari hukumatni tanqid qilmoqda. Ular yo‘l qurilishi keyinchalik yana-da ko‘proq o‘rmonlarning kesilishiga olib kelishi va bu Amazon ekotizimiga jiddiy zarar yetkazishini aytishmoqda. Yo‘l yaqinida yashovchi baʼzi odamlar o‘z daromad manbalaridan mahrum bo‘lishgani va hech qanday tovon puli olmaganliklarini bildirishmoqda.
Braziliya hukumati esa yangi yo‘l bo‘ylab daraxtlar ekilishi va hayvonlar uchun maxsus o‘tish joylari tashkil etilishini vaʼda bermoqda. Prezident Lula da Silva sammit Amazon o‘rmonlarini himoya qilish masalalariga bag‘ishlanishini taʼkidlagan. Shunga qaramay, atrof-muhit himoyachilari iqlim muhokamasi uchun o‘rmonlarni yo‘q qilish noto‘g‘ri qaror ekanligini eslatmoqda.
