Bojlar sabab milliarderlar bir kunda 208 milliard dollar yo‘qotdi
COVID-19 pandemiyasi davridan beri bu qadar katta yo‘qotish qayd etilmagan.
AQSh prezidenti Donald Tramp import tovarlariga yangi bojlar joriy qilganini e’lon qilgach, bu qaror aksiyalar bozoriga kuchli zarba berdi. Natijada, dunyoning eng boy odamlari bir kun ichida jami 208 milliard dollar boylikdan ayrildi.
Bu holat Bloomberg Billionaires Index tarixidagi eng katta boylik yo‘qotishlaridan biri bo‘ldi — hatto COVID-19 pandemiyasi davridan beri bu qadar katta yo‘qotish qayd etilmagan edi.
Eng katta zararni Mark Sukerberg ko‘rdi. Uning “Meta” kompaniyasi aksiyalari deyarli 9 foizga tushdi va bu natijada u 17,9 milliard dollar boylikdan ayrildi — bu uning shaxsiy boyligining deyarli 9 foizi tashkil etadi.
Shuningdek, Amazon asoschisi Jeff Bezos ham 15,9 milliard dollarga, Ilon Mask esa 11 milliard dollarga yaqin yo‘qotishlarga uchradi. Ularning boyligi asosan kompaniyalari aksiyalariga bog‘liq bo‘lgani uchun, aksiyalar tushishi bevosita moliyaviy holatlariga ta’sir ko‘rsatdi.
Trampning yangi boj siyosatiga ko‘ra, har bir import mahsulotiga 10 foizlik asosiy boj belgilandi. Lekin ayrim davlatlar uchun bu ko‘rsatkich ancha yuqori: Xitoydan keladigan tovarlar uchun 34 foiz, Vetnamdan — 46 foiz, Yevropa Ittifoqidan esa 20 foizgacha.
Yangi bojlar dunyo miqyosida investorlar ishonchiga ta’sir qilgan va bu milliardlab dollarlarning bir zumda “yo'q bo'lib ketishiga” sabab bo‘lmoqda.
