Rossiya Ukrainaga raketa hujumi uyushtirdi
Hujum oqibatida 21 kishi halok bo‘lgan.
13-aprel ertalab Rossiya tomonidan Ukrainaning Sumi shahriga uyushtirilgan raketa hujumi oqibatida 21 kishi halok bo‘ldi, 83 nafari esa turli darajadagi tan jarohatlarini oldi. Bu haqda Ukraina ichki ishlar vaziri Igor Klimenko ma’lum qildi.
Zarbalar oqibatida o‘nlab binolar vayron bo‘lgan, mahalliy tarmoqlarda yonayotgan mashinalar va transport vositalarining videolari tarqaldi.
Ukraina prezidenti Vladimir Zelenskiy bu hujumni "oddiy odamlarning tinch hayotiga qilingan zarba" deya baholab, halok bo‘lganlarning yaqinlariga hamdardlik bildirdi.
"Bu hujum yakshanba kuni — odamlar dam oladigan, cherkovlarga boradigan paytda ro‘y berdi", — dedi u.
Zelenskiy, shuningdek, AQSh, Yevropa va boshqa davlatlarni Rossiyaning bu harakatlariga keskin va qat’iy javob qaytarishga chaqirdi. Uning ta’kidlashicha, Rossiyaga qarshi real bosim bo‘lmas ekan, urush tugamaydi.
